அங்கிருந்தே ஒரு குரல் ..

உலகத்தின் ஒவ்வொரு மூலையிலும் “மனிதம்” இருக்கிறது! அதை அவரவர் தேவைக்கேற்ப மூடிமறைத்துக்கொண்டிருப்பதனால் தான் சில நேரங்களில் உண்மையான அவலக் குரல்கள் வெளியில் கேட்பதில்லை.

இந்த வலைப்பூவில் எதை நாம் வலியுறுத்துகிறோமோ அதை அங்கிருந்தே ஒரு குரல், அத்தனை அல்லல் மத்தியிலும் சொல்லக் கேட்ட போது, காது குளிர்கிறது ! “ஆம்” மனிதம் அழிந்துவிடவில்லை என்று பெருமைப்பட வைக்கிறது.

அதை உங்கள் கண்களால் ஒளிப்படமாய்க் காணுங்கள் !

கீழே ஒரு வீடியோ இணைப்பைத் தரப்போகிறோம், அதில் ஒரு “உண்மைச் சங்கதியையும்” சொல்லப்போகிறோம், உங்கள் அறிவுடன் மோதிக்கொண்டு அதை ஏற்றுக்கொள்ள முடியுமா பாருங்கள்.

புலி எதிர்ப்பு எனும் ஒரு கோஷம், தனியாகப் புலிகளை எதிர்க்க வேண்டும் என்பதற்காக ஒலிப்பதல்ல, புலிகளின் அடாவடித்தனங்கள், அவர்கள் தம் சமுதாயத்திற்குக் கொண்டு சேர்த்த அவலங்கள் மூலம் வலுப்பெற்று ஒலிக்க ஆரம்பித்த ஒரு கோஷமாகும்.

விடுதலைப் புலிகள் அமைப்பு ஒரு விடுதலைப் போராட்ட வழியிலிருந்து வெளிச்சென்று மக்கள் நலன் பற்றிச் சிந்திக்காத ஒரு ஆயுத மோகங்கொண்ட அமைப்பாக மாறிய நாட்களிலிருந்து இந்தக் குரல்கள் உலகெங்கும் ஒலித்துக்கொண்டிருக்கிறது, பாவம் கேட்கத்தான் ஆள் இல்லாமல் போனது.

சரி, அதையெல்லாம் விடுவோம், இது நேற்றைய தினம் (16-05) நந்திக்கடல் களப்பு வழியாகத் தப்பி வருவோர், கரை சேரும் போது இலங்கையின் ரூபவாஹினி தொலைக்காட்சிக் குழுவினர் அங்கிருந்து படம் பிடிக்கும் காட்சி.

மக்கள் அந்தப் பயங்கர சூழ்நிலையில் உயிரைக் கையில் பிடித்துக்கொண்டு, தம்மால் முடிந்த அத்தனை வழிகளிலும் தப்பி வருகிறார்கள்.

கையில் குழந்தைகளையும் தூக்கிக்கொண்டு டியுபில் ஏறி கொந்தளிக்கும் கடலைத்தாண்டி வருகிறார்கள், நடேசன் ஐயாவின் கூற்றுப்படி அவர்களாகவே விரும்பி விடுதலைப்புலிகளே எங்கள் காவலர்கள் என்று அந்தப்பக்கம் இருந்த இருதித் தொகுதி பலிக்கடாக்களில் இவர்களும் அடங்குவர்.

சரி, அந்தக் குற்றச்சாட்டைக் கூட விடுவோம்!

கரை சேரும் போது, கடல் நீரில் ஆடை கழன்று போய், அந்தத் தள்ளாடும் வயதிலும், நாலு காலில் நடக்க நிர்ப்பந்திக்கப்படும் அந்த வயதான மூத்த தமிழ் மகனைப் பாருங்கள் !

கரை சோந்ததும் உயிர் தப்பியது என்று நினைத்த மறு கணம், எம்மை விட்டுப் போய்விட்டார்கள் என்ற விரக்தியில் மறுபுறமிருந்து புலிகள் துப்பாக்கி வேட்டுக்கள் தீர்க்கப்படும் போது அவர்கள் உயிருக்குப் போராடும் உண்மை நிலையைப் பாருங்கள்!

அத்தனைக்கும் மேலாக இதே ஒளிப்படத்தில் 2 வது நிமிடம் 13வது செக்கனில் வந்து  பேசும் அந்த அபலைத் தமிழ்ப் பெண் என்ன கூறுகிறார் என்று செவி மடுத்துக் கேளுங்கள்.

ஐயா, மனிதக்காவலர் என்று கூறி எம் எதிர்காலத்தையே அழிக்கும் கனவான்களே, முடிந்தால் அந்தப் பெண்ணின் பாதத்தைத் தொட்டுக் கும்பிடுங்கள், ஒரு உண்மையான தாயின் உள்ளத்தை நன்றாக உங்கள் உயிருக்கும் போதே உங்கள் சொந்தக் கண்களால் பாருங்கள்.

இப்படி ஒரு பெண் அங்கிருப்பது ஒன்றே போதும், இன்னும் ஆயிரம் வருடங்களுக்கு நாங்கள் இந்த விழிப்புணர்வுக்காகப் போராடத் தயாராக இருக்கிறோம்.

உயிர் தப்பி வந்த அந்த நிலையிலும் ” தெருவொரங்களில் எம் மக்கள் கஷ்டப்படுகிறார்கள், யாரும் அற்ற அனாதைப் பிணங்களாகக் கிடக்கிறார்கள், நான் தப்பி வந்துவிட்டேன், ஆனால் அனைவரும் மீட்கப்பட வேண்டும், அரசிடம் சொல்லி அனைவரையும் மீட்கச் சொல்லுங்கள், நான் உயிர் பிழைத்ததில் பிரயோசனமில்லை, எல்லோரும் வாழ வேண்டும்,எல்லோரும் உயிர் பிழைக்க வேண்டும், அவர்களைக் காப்பாற்றுங்கள்” என்று கதறி அழுகிறார்.

புலிக் கனவான்களே, உங்கள் செவிட்டுக்காதுகளுக்கு அந்தப் பெண்ணின் தூய உள்ளத்துடனான கதறல் கேட்கிறதா பாருங்கள்!

அந்தப் பெண் சிங்கள மொழியில் கதறுகிறாள், எனவே ஒரு சிங்கள மொழிபெயர்ப்பாளரை அதுவும் ஒரு புலி ஆதரவில்லாத சிங்கள மொழிபெயர்க்காளரை வைத்து அவள் உண்மையில் என்னதான் கூறுகிறாள் என்று கேட்டுப்பாருங்கள்.

தன் உயிர் தப்பி வந்த அந்தக் கணத்திலும் மற்ற உயிர்களையும் பற்றிச் சிந்திக்கும் இந்தத் தாயையும் சேர்த்துத்தான் ஐயா நீங்கள் பலி கொடுக்கப் பார்த்தீர்கள், ஆயிரத்தில் எத்தனை பேரை ஆபத்திலும் சுயநலமில்லாமல் காண்பீர்கள்?

உங்கள் சுயநலத்திற்காக நீங்கள் கொன்ற கணக்குகளை விட நீங்கள் பலி கொடுக்கத் தயாரான கணக்கு அதிகமானது, ஆனால் அதிஷ்டவசமாக உம் அப்பன் அதுதான் அந்தக் கடவுள் அந்த மக்கள் பக்கம் இருக்கிறான் !

இப்போது வீடியோவைப் பாருங்கள் ..